INDIO

TIA [Talena Is Aziltherocker]

Indio!

Indio pagparet ong orasyon mo
Belag ta masinlo tang aladien mo
Indio magtalig ang mapa-uyao nio
Malain tang puputukon mo.

Indio!
Indio pagparet ong imod mo
Mga ingsing magang ong kiro
Belag ta taraligan labi pa manalyudo
Gata-wanano ra mga onopa ay buwelta mo.

Indio!
Indio pagparet ong sarabien mo
Labi pa ka enged mga pamundoa ong entablado
Asia puwesto ta mga maago ig bu-lien ang pulitiko
Nga gademdem tang kasimanwa nira oras ang mamangako.

Indio!
Indio pagparet ang yawa tatang santo
Maski pa aningen ang yawa religioso
Kayading mangalok tang kaparyo mo
Pamagtu-tok ta pekeng rosarito.

Indio!
Indio ra ka pagparet ong tanan ang husgado
Kayading inosente ang naging kuluno
Tenged lamang ong kabu-lian mo
Patawadena tang Ampuano.

Aryo ra lamang bato magparet?
Ong kayayadien tang panget
Bebegeng begeng ang anday pet
Ong pararareten mo indi ka ma-pet.

Mambaelo ka asta maging kalmado
Agod ang kamatodan ig tu-lid mantepo
Ang indio ra magpauto ong nio
Ong bu-tot ang paniniwala mo.

Kung timpong asi kumabot da kay
Tanan ang bui mangalipay
Mangaelen belag lamang ong tinapay
Mapagparet ong kamatodan da kanay.


[Para ong tanan ang gabui... belag ta tanan ang gitaen ta ig agpareten sisigon ong kamatodan. Maging vigilante ita maski ong mga sadili ta!]